Yara sa kritikal nga kondisyon ang isa sa apat ka mga pasahero sang puti nga Mazda3 nga gin-ambush sa Villa Lina, Barangay Palampas, San Carlos City, Negros Occidental, Domingo sang aga.
Madumduman nga nagasakay sa puti nga Mazda3 sanday Andre Fajardo, 18-anyos, residente sang Ylagan, extension, Barangay 6; Russel Bucao, 40-anyos, kasado, residente sang Urban Phase 1, Brgy. Rizal; Rudy Dela Fuente, 51-anyos; kag Renante Chiu, 27-anyos, lunsay residente sang San Juan Baybay, San Carlos City.
Tadtad sang bala ang awto gani dead on the spot sanday Fajardo kag Bucao samtang dead on arrival sa ospital si Dela Fuente.
Sa karun, nakaconfined pa sa San Carlos City Hospital si Chiu kag yara sa kritikal nga kondisyon matapos nakaagom sang madamo nga igo sang bala.
Santo sa report sang San Carlos City Police Station, padulong ang mga biktima sa bulangan sang gin-ambush sa Villa Lina.
Una diri, ginkompirmar sang alkalde sang syudad sang San Carlos nga si Renato Gustilo nga may yara sang bulang nga ginapatigayon sa mga kabarangayan sa syudad sa kada adlaw sang Domingo nga kadtuan kuntani sang biktima sa ambush.
Padayon pa sa karun ang imbestigasyon sang mga kapulisan agud nga matumod ang motibo sa ambush kag may kahimuan sini.
Santo naman sa pahayag sang utod ni Russel Bucao nga si Vicky, mabuot ang iya utod, wala sang kontra kag wala man naga-engage sa illegal nga mga buluhaton.
