Wala pa sang identity ang bangkay sang lalaki nga nasapwan sa kampo sang tubo sa Hda, Bernabe, Brgy. Salvacion, Murcia, Negros Occidental.
Sa interview sang Bombo Radyo Bacolod kay Police Major Sherwin Fernandez, hepe sang Murcia Municipal Police Station, ang bangkay ang nasapwan sang isa ka nagaarado sa kampo.
Suno kay Fernandez, samtang nagaarado ini may yara siya sang napamanimahuan nga sa umpisa gindumdom sini nga patay nga sapat apang sang makita nga ini ang kaangay nga ginlubong nga tawo gilayon niya ini nga ginreport sa tag-iya sang kampo.
Ang tag-iya sang kamo naman amo ang nagreport sa mga kapulisan.
Gilayon man ini nga ginrespondehan sang mga kapulisan agud nga mausisa kag maimbestigaran kun sa diin nakumpirmar nga ini ang bangkay sang isa ka lalaki.
Suno sa hepe ang bangkay sang isa ka lalaki ang nagakaagnas kag nakasuksok lamang sang underwear samtang yara sa 5-foot-7 ang iya kataason.
Ang bangkay ang gin-alegar hungod nga ginlubong sa kampo kag ini nasapwan 20 metros ang kalayuon nagikan sa access road.
Ang dalan ang masami naman nga ginaagyan.
Ginabanta nga mga napulo tubtob 15 na kaadlaw na ang bangkay sa kampo antes pa masapwan.
Ang kamot ang yara sa likod apang wala man nakahigot.
Wala naman sang makita nga tattoo bangud nagakadunot na ang panit sini.
Wala man sang traces sang krimen nga makita sa lugar bangud napanas na ini sang mga pag-inulan sang nakaligad nga adlaw kag matag-as naman ang gintanom nga tubo.
Naproseso naman sang operatiba sang Scene of the Crime Operation (SOCO) ang bangkay kag nadala sa punerarya.
Wala man sang reported nga missing person sa banwa gani indi nagikan sa banwa ang biktima.
Nagapanawagan man si Fernandez sa publiko kun sin-o ang may himata nga wala nakapauli nga makig-angot lamang sa Murcia Municipal Police Station.
Padayon sa karun ang imbestigasyon sang mga kapulisan angot sa nasapwan nga bangkay.
