Yara na sa advanced state of decomposition ang bangkay sang isa ka lalaki nga nasapwan sa idalum sang Oyut Bridge, Sitio Lantawan, Barangay Guimbala-on, Silay City sang Disyembre 31 sang aga.
Sa interview sang Bombo Radyo kay Police Lt. Col. Mark Anthony Darroca, hepe sang Silay City Police Station, sang Disyembre 26, alas 11:55 sang gab-i, nabugtawan ang isa ka residente bangud sa matunog nga sound sang isa ka salakyan sa Oyut bridge.
Sang iya ini ginlili sa bintana, nakit-an sini ang isa ka Brown Toyota Innova nga wala sang plate number nga nagapundo sa taytay.
Nagwa ang duha ka wala pa makilal-an nga mga persona bitbit ang isa ka sako nga nagaunod sang iya sadto gin-abi nga basura.
Pagka-Disyembre 30, alas 4:00 sang hapon, gintsekyar sang witness kaupod ang iya amay ang sako nga ginhaboy sa taytay kag ila nakit-an ang isa ka bangkay sang lalaki nga yara na sa state of decomposition kag mga skeleton sang duha ka mga persona sa separado nga sako.
Suno kay Darroca, sang Disyembre 31, alas 10:00 sang aga, ginkadtuan ini sang mga kapulisan apang bangud nga kapin 300 feet ang kadalumon sang taytay, alas 4:00 na nila naretreive ang bangkay.
Sa ila padayon nga imbestigasyon, nakit-an man sang mga ini ang isa ka sako nga may unod nga skeleton sang duha ka mga persona.
Suno sa iya, lunsay mga lalaki ang mga biktima kag lunsay wala man sang mga identity.
Suno kay Darroca, ang bangkay nga yara sa state of decomposition ang hublas kag wala sang bayo ukon sapatos kag ginabanta lima tubtob anum ka adlaw na nga napatay.
Samtang, ginalantaw nga masobra isa ka bulan naman nga napatay ang duha ka mga skeleton.
Gindala sa punerarya ang mga skeleton samtang Lunes sang aga, ginpalubong na ang una nga nakit-an nga bangkay matapos ginpaidalum sa autopsy.
Suno diri, wala sang may nakapablotter sa Silay City Police Station sa nagliligad nga mga inadlaw nga sila ang may namissing nga himata.
Nagapanawagan ini sa mga may namissing nga himata nga magpadulong sa estasyon agud ila maidentify ang bangkay.
