Wala pa makilal-an ang bangkay sang isa ka lalaki nga nasapwan nga nagakaagnas na sa Hacienda Canla-on 1, Barangay Sag-ang, La Castellana, Negros Occidental kahapon sang aga.
Sa interview sang Bombo Radyo Bacolod kay Police Major Melchor Panat-an, Officer-in-Charge sang La Castellana Municipal Police Station, sang Hwebes sang aga, nakabaton sila sang impormasyon nga may yara sang nasapwan nga bangkay kag gilayon man nga ginpadulong sang imbestigador kun sa diin nakita sa lugar ang isa ka patay nga lalaki sa dam sa nasambit nga lugar.
Suno kay Panat-an, sa inisyal nga imbestigasyon, ang bangkay ang nalabayan sang nagapanguha utan mga alas 8:30 ang takna sang aga.
Suno sa hepe ang lalaki ang nagataas sang 5ft kag ini ang may tattoo sa nawala nga abaga nga kandila nga may pangalan nga Melvin.
Suno diri, nakig-angot na ang mga kapulisan sa medical officer sang La Castellana Municipal Health Office agud nga magpatigayon sang postmortem examination sa bangkay kag ginahulat man sang mga ini ang report sang Scene of the Crime Operations (SOCO).
Ginalantaw sang hepe nga mahimo nga naanod ang biktima bangud mabaskog ang pagbubo sang ulan sang nagligad nga mga inadlaw.
Nagapadayon ang imbestigasyon sang La Castellana Municipal Police Station agud nga matumod ang identity kag ang rason sang kamatayon sang biktima.
