Igapaidalom sa autopsy examination ang bangkay nga yara na sa advanced state of decomposition nga nasapwan nga nakasulod sa sako sa isa ka tamburong sa Barangay Damsite, Murcia, kahapon.
Sa interview sang Bombo Radyo kay Police Major Marc Roel Reclamado, hepe sang Murcia Municipal Police Station, nakabaton ini sang tawag gikan kay Punong Barangay Regie Burata sang Barangay Damsite, Murcia, nga may yara sang sako nga nakit-an sa sulod sang tamburong nga nagapanimaho kag sa ila pag-tsekyar may yara sang tawo sa sulod sang sako.
Suno kay Reclamado, ila ini ginpadulongan kag nakig-angot sa team sang Scene of the Crime Operation (SOCO).
Sa inisyal nga imbestigasyon, nakilal-an nga lalaki ang bangkay nga ginabanta may height nga 5’6 kag naga-edad sang 32 tubtob 35 anyos.
Wala naman ginbuksan pa ang sako kag ini ang gindala sa morgue nga ipadalom sa autopsy examination sang SOCO.
Nagpanawagan si Reclamado sa may luyag nga magkumpirmar kun ila himata ukon kakilala ang bangkay nga magpadulong lamang sa ila estayson ukon sa Funeraria Del Lourdes agud matsekyar.
Madumduman nga sang Marso 15 may yara man sang nasapwan nga tul-an sang tawo nga nakasulod sa sako sa nasambit nga lugar nga tubtob sa karun wala pa sang identity.
