Hugot nga ginakondenar sang Department of National Defense (DND) ang tanan nga nagakwestyon kag nagapamalaot sa mga operasyon nga ginapatigayon sang Philippine Army.
Ini ang kasunod sang kamatayon sang isa ka suldado sa nagluntad nga engkuwentro sa Brgy. Tamlang, Escalante City sang Hunyo 1.
Sa interview sang Bombo Radyo kay Defense Secretary Gilberto Teodoro Jr., ginpahayag sini nga wala sang kamatuoran ang mga alegasyon nga nagapatay sang mga sibilyan ang mga suldado.
Suno sa tiglikom, ang natabo nga engkwentro sa ciudad sang Escalante ang pamatuod nga legitimate kag intelligence-driven ang mga operasyon sang militar.
Sa pihak nga bahin, gindayaw ni Teodoro ang napatay nga suldado nga si Private First Class Jhon Rey Brasil, 29-anyos kag residente sang Barangay Buluangan, Guimbal, Iloilo.
Ginlaragway sini si Brasil bilang isa ka maayo nga suldado nga napatay nga may dignidad kag naghalad sang iya nga kabuhi para sa pagserbisyo sa pungsod.
Suno kay Teodoro, indi dapat pag-ibalewala ang mga sakripisyo sang mga suldado gani nagapanawagan siya sa mga nagakwestiyon sa operasyon sang militar nga atubangon ang pamilya sang napatay nga suldado kag hambalon sa mga ini nga wala sang bili ang sakripisyo sini.
Nagmando naman ang Secretary of National Defense nga hatagan sang medical intervention ang nabalo ni Brasil nga 24 anyos pa lamang bangud kahapon sang pagbisita sini, indi ini maestorya sa pagtalangison.
Si Brasil ang ihaya sa Barangay Pandanon Silos, Murcia kag siya ang igalubong sa Hulyo 1.
Samtang, mensahe ni Teodoro, hindi na dapat pagestoryahan ang peace talks sang gobyerno sa rebelde nga grupo bangud mahimo nga ini ang gamiton sang mga rebelde agud nga pagwaon nga lehitimo ang ila nga ginahimo.
Sa pihak nga bahin, nakilala naman ang mga rebelde nga naengkwentro nanday Private First-Class John Rey Brasil, ang suldado nga napatay sa engkwentro.
Suno kay Lt Col Eric Alfonso, ang isa sa mga naengkwentro sang mga suldado amo si Alejandro Kier Montoya nga kaupod ni Roger Fabilliar alyas Arnel Tapang.
Suno kay Alfonso, ginpatay ni Montoya ang iya sibilyan nga utod sa Barangay Gawahon, Victorias City.
Sa nakuha nga impormasyon sang Bombo News Team ang pangalan sang utod ni Montoya nga ginpatay amo si Jhonhi.
Natabo ang krimen sa covered court sang Barangay Gawahon sang Abril 2025
Antes pa man si Montoya nagsulod sa New People’s Army, pugante ini kag may mga kaso nga murder, carnapping kag act of lasciviousness.
Sa karun, padayon pa nga gina-ayam sang mga otoridad si Montoya.
