Na-identify na ang gin-utdan sang kamot, tiil kag duha ka dulunggan nga ginbilin sa opisina sang National Bureau of Investigation Bacolod sadtong Marso 1, subong nga tuig.
Ang nawala nga kamot nga gin-utod nagikan sa abaga tubtob sa tudlo, ang nawala nga tiil ang halin sa tuhod tubtob sa tudlo kag duha ka dulunggan ang ginbilin sang NBI office sa Aguinaldo Street, kapin alas 5:45 sang kaagahon.
Nakita sa ginsudlan sang chop-chop nga body parts ang sulat nga “William de Arca NBI protector ni Hanz Lopez drug lord”.
Kaina, ginkumpirmar ni NBI Bacolod head Atty. Renoir Baldovino nga si Baltazar Lamata nga residente sang Brgy. Pahanocoy, Bacolod City ang gin-utdan sang mga bahin sang lawas.
Ini ang naidentify paagi sa pagpagkumpara sang iya nga fingerprint sa fingerprint specimen nga ginauyatan sang NBI bangud nagkuha si Lamata sang NBI clearance antes ini namissing.
Sang nasapwan ang mga chop chop nga body parts, nagpadulong sa Bacolod Police Station 2 ang live-in partner kag bata ni Lamata kag nag-claim nga si Baltazar ang nagapanag-iya sang bahin sang lawas apang wala ini nagconclude ang mga police bangud indi mabakod ang ebidensya para diri.
Antes nasapwan ang mga parte sang lawas, namissing si Lamata humalin sa ulihi nga sinemana sang Pebrero.
Sa inisyal nga report sang NBI, nakabaton ang mga ini sang report nga si Lamata ang isa ka drug personality.
Tubtob sa karun, wala pa nakita ang lawas sang biktima.
