Aminado ang election officer sang Bacolod City nga nagnubo ang numero sang mga nagaparehistro para sa 2022 elections sang sa nagliligad nga mga tinuig bangud sa coronavirus pandemic.
Sa interview sang Bombo Radyo kay Atty. Jan Saril, ginpahayag sini nga sang una, wala naganubo sa 200 ukon 100 ang numero sang mga nagaparehistro kada adlaw apang sa karun, 55 lang ang kabug-usan nga nakaparehistro halin sang Oktubre 1 tubtob Oktubre 3.
Suno kay Saril, bangud nga ginpaidalom sa modified enhanced community quarantine (MECQ) ang ciudad, ginsuspender sang COMELEC ang registration sang Setyembre 8 kag nagresume ini sang Oktubre 1.
Iya man naintindihan ang kahangawa sang mga pumuluyo nga magwa sa ila puluy-an bangud sa pagpamahog sang virus kag tubtob paman sa Setyembre 2021 ang registration period apang kun maayo man lang ang panglawasun, gina-engganyo sini ang mga pumuluyo nga magparehistro samtang timprano pa agud indi na maginutok sa masunod nga tuig.
Sa mga new registrants nga naga-edad 20-anyos panubo, suno sa COMELEC officer, kinahanglan magdala sang valid ID kag certified and true copy sang birth certificate samtang sa mga naga-edad naman sang masobra 20-anyos, valid ID lang ang kinahanglanon.
Nagapanawagan man ini sa mga maparehistro nga magsunod sa mga health protocols kaangay sang pagsuksok sang face mask kag face shield.
Pag-abot sa talatapan, suno kay Saril, ginarequire ang mga pumuluyo nga magpanghugas anay sang kamot sa ila handwashing area, magpatsekyar sang temperature kag magfill-up sang health declaration form.
Gindugang man sini nga ila man ginatinguhaan sa karun kag ginaproseso nga marehistro ang BAC-TRAC system sa establishemento agud mas mangin mahapos ang pagtsekyar sa mga nagasulod.
