Nagdangat sa masobra 3,000 ang nagbisita sa Burgos Public Cemetery kahapon.
Sa interview sang Bombo Radyo Bacolod kay Police Major Marc Joel Reclamado, station commander sang Police Station 4, madamo sang nagpadulong sa patyo kahapon sang aga apang sang hapon mas nagdamo na gid ang mga tawo.
Suno diri, iban sa mga nagbisita nagasindi kag nagapauli lang man kag wala na nagatinir pa.
Wala naman sang reported nga nagkaladula nga mga gamit, wala man sang may nalipong kag wala man sang may nakumpiskar nga mga kontrabando.
Samtang, may yara pa sang naghingagaw maminta sang mga pantyon kag nanglimpyo sa lugar.
Liwat sini nga ginpahanumdom sa mga mabisita sa patyo ang mga ginadumilian nga dal-on kaangay sang mga patalom, makahulubog nga ilimnon kag baraha sa pagpanahor.
Samtang, nagdangat naman sa kapin 4,000 ang mga tawo nga nagbisita sa Handumanan Public Cemetery kahapon para sa tigkalalag.
Sa interview sang Bombo Radyo Bacolod kay Police Captain Glenn Montaño, station commander sang Bacolod Police Station 10, wala sang dapat nga ikabalaka ang mga mabisita bangod walo ka mga police personnel ang ila gindeploy.
Suno diri, may apat ka pulis sa entrance agud magtsekyar sa mga dala sang mga magabisita samtang may apat man nga yara sa sulod nga nagaroving.
Magluwas sa kapulisan may yara man sang mga force multiplier, Brgy tanod kag personnel sang Public Order and Safety Office.
Pahayag sini nga madamo sang nagpadulong sa patyo sang hapon bangod indi na mainit kag manami ang panahon.
