Gin-athag sang Negros Electric and Power Corporation (NEPC) nga bangod sa nagcollapse nga power transformer ang rasun sa nagluntad nga blackout sa coverage area sang Alijis Substation.
Sa interview sang Bombo Radyo Bacolod kay NEPC Spokesperson Jonathan Cabrera, nag-umpisa ang blackout alas-8:53 kagab-i kun sa diin apektado ang pito ka mga Feeders nga konektado sa Alijis Substation.
Suno diri 13 anyos na ang power transformer kag ulihi nga napatigayunan sang maintenance sang first quarter sang 2023.
Paathag ni Cabrera nga kalakip gid man ang pag-ilis sang power transformer ang Alijis Substation sa ila 5-year development plan, kag ini kuntani ang umpisahan sa mga masunod nga binulan.
Apang ginakasubo sini nga nauna nga nagcollapse ang power transformer, kun sa diin sila ang nakakita sang oil leakage sa external, kag ginalantaw nga mas malala ang internal damage sang equipment.
Amat-amat na nila nga ginbalik ang power supply sa mga apektado nga lugar pinaagi sa pagkonekta sang mga feeders sa kalapit nga substations.
Suno diri, kun bukaron ang power transformer ini ang magalawig man sang sinimana, gani ginapakamaayo nila nga islan na lamang sang bag-o.
Apang ang installment ang mangin malawig man kasubong man ang pagkonekta sang mga linya.
Sa karun nga wala pa, ginatinguhaan anay nga ma-angot sa katupad nga mga Substations ang apektado nga feeders.
Apang sa karun ang wala pa ma-angot amo ang Feeder 3, bangod sila ang kinahanglan nga maglatag sang bag-o nga power lines nga magakonekta sa Murcia substation nga nagadangat sa pito ka kilometros.
