Natumod na nga ‘Faw Army Worms’ ang breed sang mga ulod nga nagapanghalit sa malapad nga mga katubuhan kag maisan sa 5th District sang Negros Occidental.
Sa interview sang Bombo Radyo Bacolod kay Negros Occidental 5th District Representative Atty Dino Yulo, nagpadala sang pathologist kag entomologist ang Sugar Regulatory Administration (SRA) nga nagkuha sang samples agud matun-an sang maayo ang mga peste.
Paathag sang mga inio nga normal na ang infestation matapos ang climate changes.
May duha naman ka paagi sa paglapta sang Faw Army Worms ini amo ang pagsaylo pinaagi sa duta kag ang pagpangitlog sang mga army worms kun mangin adult na nga moth sa iban nga lugar.
Suno diri, ang mga Faw Army Worms ang may dako nga appetite kag kaangay nga wala naga-untat sa pagkaon, apang sila ang mas active sa gab-i.
Ginakahangaw-an ni Yulo nga maulamid sa kahalitan ang mga humayan sa Negros Occidental.
Paathag sini nga kinahanglan gulpyada ang pagpapas sa mga insekto agud indi na magsaylo-saylo pa.
Aminado naman ini nga may mga indi matapat sa spraying sang insecticide bangod ang iban ang yara sa duta, gani may mga suhestyon man nga patubigan anay ang talamnan agud magsaka ang mga ulod antes ang spraying.
Suno kay Yulo, alarming na ang pagduging sang Faw Army Worms kag mabatyagan ang seryoso nga epekto sini sa milling season kun indi gilayon matapna.
