Nangin matawhay ang opisina sang Commission on Elections sa Bacolod kadungan sang una nga adlaw sang filing sang certificate of candidacy para sa mga luyag nga magpadalagan sa 2022 national and local elections.
Ang una nga nagfile sang COC amo ang anay seafarer nga si Allan Arroyo sang Barangay Sum-ag nga magapadalagan bilang konsehal.
Ini na ang ikatatlo nga kahigayunan nga nagpadalagan si Arroyo bangud nagfile man ini sang COC halin sang tuig 2016 bilang independent candidate.
Kalabanan naman nga nagpadulong sa Comelec Bacolod ang nag-inquire lamang sang mga kinahanglanon para sa filing sang COC.
Sa interview sang Bombo Radyo kay Bacolod City election officer Atty. Kathrina Trinio Caña, nagpanawagan ini sa mga luyag magpadalagan sa masunod nga eleksyon nga temprano pa mag-file sang COC.
Suno diri, mas maayo kun indi na paghulaton ang ulihi nga adlaw sang filing sang COC bangud mahimo nga may kulang sa requirements kag indi na makahingagaw sa deadline.
Kun temprano pa magfile sang COC suno kay Caña, may tion pa agud nga magrectify sang kulang.
Hugot naman nga ginapatuman sang Comelec ang minimum health protocols kun sa diin duha lang ka tawo ang maximum nga makaupod sa isa ka kandidato.
