Nagtukod sang coalition ang pila ka mga sektor sa Negros Occidental kag Bacolod City bangod sa tuman nga pagsaka sa presyo sang gatong.
Sa interview sang Bombo Radyo Bacolod kay Bacolod Alliance of Commuters, Operators and Drivers (BACOD-Manibela) President Rudy Catedral, luwas sa ila nga transport sector, upod man sa coalition ang grupo nga BAYAN, labor sector, fisherfolks, mga abogado, professionals, kaparian kag mga estudyante.
Suno diri, tanan nga apektado ang sarang gid makigbahin sa coalition.
Isa sa ila panawagan amo ang pagsuspender na sang fuel excise tax kag 12 percent value added tax.
Pahanumdom sini nga ginhatagan na sang legislative department sang gahom si President Ferdinand “Bongbong” Marcos Jr sa pagdesisyon, gani pahanugot na gid lamang sini ang kulang.
Isa pa sa ila nga panawagan nga isubsidize sang gobyerno ang ginsaka sa presyo sang gatong sumugod sang nag-epekto ang gyera sa middle east.
Suno kay Catedral, sadto P55 lamang ang kada litro sang Diesel, gani ang nadugang diri ang kuntani saluon na sang gobyerno.
Kasubong man ang panawagan nga mahatag na sa ila ang ayuda.
Suno kay Catedral, mas nauna pa nga nahatagan ang mga tricycle drivers nga kapin duha ka litro lamang ang konsumo nga gasolina kada adlaw sangsa mga jeepney drivers nga nagatughong sang napulo ka litro pasaka kada adlaw.
Dugang pa sini nga luwas nga binulan na ang ila pag-antos kag sa pagkadelay sang ayuda, madamo pa sang mga drivers nga nadula sa listahan.
Suno kay Catedral, wala na nagapabatyag si Land Transportation Franchising and Regulatory Board – Negros Island Region Director Atty Gerry Llena, gani wala sila nakahibalo kun kumusta na ang status sang fuel subsidy sa mga jeepney drivers.
