UKRAINE – Masobra 2,000 na ka mga Ukrainian civilians ang nagkalamatay humalin sang gin-invade sang Russia ang pungsod sang Pebrero 24 suno sa Ukrainian emergency services.
Santo sa anunsyo, linibo ka mga structures lakip na ang mga transport facilities, hospitals, kindergartens kag mga puluy-an ang nagkalaguba bangud sa nagapadayon nga pagpangbimba kag pagpang-atake sang Russian troops.
Suno sa United Nations Human Rights Monitoring Mission, sang Marso 1, nakarekord ini sang 754 ka mga civilian casualties sa Ukraine humalin sang nagsugod ang invasion.
Sang Huwebes, ginpahayag ni Ukrainian President Volodymyr Zelenskyy nga nagdangat na sa kapin 9,000 ang Russian death toll.
Apang sa labing una nga kahigayunan, ginkumpirmar sang Russian Defence Ministry ang casualties sa Ukraine sang Marso 2.
Gin-anunsyar sang ministry nga nagdangat na sa 2,800 ka mga Ukrainian troops ang nagtaliwan sa inaway kag 498 ka mga Russian troops ang napatay.
Apang sa karun indi gid maverify independently ang numero nga ginhatag sang Russia kag Ukraine bangud sa ground scenario sa karun sa pungsod.
Samtang, nagpasar naman ang parliament sang Russia sang harsh nga mga layi nga magaimpose sang prison terms sa mga persona nga nagapalapta sang “fake news” tuhoy sa mga militar ukon sa mga nagapanawagan sang sanctions batok sa Russia.
May pila naman ka mga media outlet nga ginsuspendi ang pagtrabaho sang mga journalists sa Russia.
Ginblock man ang Facebook kag Twitter sa pungsod.
