Indi magnubo sa 22 ka mga persona ang nagkalamatay kag madamo ang pilason matapos ang pagpatigayon sang airstrikes sang Israel sa Beirut suno sa mga otoridad sa Lebanon.
Isa ka senior Hezbollah official ang nakasurvive sa pagpang-atake samtang duha ka mga United Nations peacekeepers sa Lebanon ang napilasan.
Ginpatawag sang Italy ang Israeli ambassador matapos naigo ang Italian bases kag gintawag ang tikang sang Israel nga “unacceptable.”
Suno kay Bombo International News Correspondent Florena Limpios Barzon direkta sa Beirut, nagalab-ot na sa capital sang Lebanon ang airstrikes sang Israel kag daw kaangay nga New Year adlaw-adlaw bangud wala untat ang pagsigabong.
Suno kay Barzon, kanselado ang trabaho kag klase sa pungsod bangud ginahimo nga evacuation center ang mga buluthuan.
Natup-an man sang airstrike ang likod sang airport apang sarang pa man ini nga magamit kag nagapadayon pa ang mga flights.
Suno diri, apat ka bulan pa lamang ini sa Lebanon kag kun wala lang kuntani sang ginamo, manami gid ang trabaho kag ang sweldo sa pungsod kun ikumparar sa Pilipinas apang mas labaw sa gihapon ang balor sang kabuhi sang tawo.
Apang aminado ini nga isa sa iya ginakahangaw-an kun ano ang iya mangin palangabuhian kun ini ang magpauli sa Pilipinas.
Suno sa iya, ang iya amo ang nagpadulong sa Nigeria agud makalikaw sa gyera kag gindala didto ang iya mga dokumento samtang sila naman ang ginbilin lamang sa Beirut.
Indi man ini pagpahanugutan sang iya amo nga magpauli rason kun ngaa pagpadulong sini sa Philippine Embassy agud magrequest sang repatriation, ginhambalan ini nga unahon anay ang mga Overseas Filipino Workers nga kumpleto ang dokumento.
Nagalaom ini nga sila ang mabuligan sang gobyerno bangud sa kahangawa nga maglala pa ang gyera sa masunod nga mga inadlaw kag wala sila sang kadtuan.
