BACOLOD CITY — Natulala ang graduate sang University of Saint La Salle sa ciudad sang Bacolod sang iya nahibaluan nga siya ang number 1 sa Top 10 sang Chemical Engineering Licensure Examination nga ginpagwa sang Miyerkules sang hapon.
Ang 21-anyos nga si John Cyril Claur sang Regent Pearl Homes, DC 2, Barangay Alijis, Bacolod City ang may 84.60 percent nga rating kag nagpatas sila ni Jared Philip Condez nga nagtapos sa University of the Philippines-Visayas.
Sa exclusive interview sang Bombo Radyo Bacolod, ginpahayag ni Claur nga padulong siya sa NAIA pabalik sa Bacolod sang naggwa ang resulta sang pasinawan.
Gindeactivate sini ang iya Facebook account kag ginpatay ang cellphone agud indi makabaton sang mensahe ukon tawag bangud nakulbaan nga basi wala siya nakapasar.
Sang natukiban sini nga siya ang nagpanguna sa mga examinees, natulala si Claur bangud indi ini makapati.
Tuman naman ang kalipay sang iya mga ginikanan nga nalangkag na nga siya ang makita bangud nagtinir ini sang pila ka bulan sa Manila agud mag-review.
Gin-ako ni Claur na luyag niya nga mangin engineer apang indi bilang chemical engineer kundi magakuha kuntani ini sang Electronics and Communications Engineering (ECE).
Apang sang nagsulod na sa kolehiyo, nangin scholar siya sang Department of Science and Technology (DOST).
Wala suno sa iya sa listahan sang DOST ang ECE gani ginpili sini ang Chemical Engineering bangud may board examination.
Nahisayran nga indi honor student sa elementarya si Claur kag nagsugod lang sa pagpasakop sa Math contest sang siya ang yara sa high school kag nangin tayuyon na sa kolehiyo kun sa diin siya ang nagtapos bilang Cum Laude.
Sa karon, luyag ni Claur na makatrabaho na agud makabulig sa iya mga ginikanan.
Ang amay sini nga si Rafael ang isa ka retirado nga empleyado sang gobyerno samtang housewife naman ang iya iloy nga si Helen.
Nagpanawagan man ini sa mga pamatan-on nga hatagan gid sang importansya ang edukasyon bangud lyabi ini agud malab-ot ang handom sa kabuhi.
