Ginklaro sang commanding officer sang 47th Infantry Battalion sang Philippine Army nga wala sang tropa sang gobyerno ang napatay sa nagluntad ang engkwentro sa tunga sang militar kag New People’s Army sang Lunes sang aga sa Brgy. Masaling, Cauayan, Negros Occidental.
Sa interview sang Bombo Radyo Bacolod kay Lt Col Dennis Martinez, Commander sang 47th Infantry Battalion sang Philippine Army, wala sang kamatuoran ang nagalapta nga impormasyon sa social media nga may duha ka mga suldado ang napatay sa engkwentro.
Suno kay Martinez, isa ini ka propaganda sang New People’s Army kag ginabaliskad sang mga ini ang matuod nga nagakatabo.
Suno diri, mabaskog ang iya pagpati nga may napatay sa hanay sang mga rebelde matapos nga masamaran sa nagluntad nga engkwentro apang ila pa ini nga i-verify.
Nagluntad ang engkwentro bangud samtang nagapatrolya ang 47th IB sa lugar, may pumuluyo nga nagreport tuhoy sa presensya sang armado nga grupo.
Ang bayluhanay sang lupok ang naglawig sang kapin lima ka minutos, apang wala pa ma-account kun pila ang nakasumpong sang militar.
Una na ginpahayag sang commanding officer nga madamo sang nakumpiskar gikan sa encounter site kag ini ang ginlakipan sang duha ka long magazine sang 5.56 rifle; isa ka short magazine sang KG9 rifle; 73 rounds sang 5.56mm; duha ka hand grenade, isa ka Commercial radio nga may charger; Hammocks ukon duyan, Ponchos; Backpacks; Bandolier kag iban pa nga personal nga pagkabutang.
