Padayon nga gin-imbestigaran sang Bacolod Police Station 1 ang video nga naglapta sa social media gikan sa isa ka babayi nga naga-alegar nga gin-hold up sa Bacolod City Public Plaza sang udto sang Hunyo 16.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 1, matapos nga makalab-ot sa iya nga igtulupangod ang nag-trending nga video sang allege hold-up gilayon ini nga nagpatigayon sang imbestigasyon.
Suno kay Tapang, nagpamangkot ang mga ini sa Public Order and Safety Office (POSO) personnel kaupod ang blue guards nga deployed.
Suno diri nagpablotter na ang POSO nga wala sila sang impormasyon nga may kaangay nga sitwasyon nga natabo.
Ginpahayag sang station commander nga gincontact man sang womens desk ang tag-iya sang account nga si Janet Pasilan agud nga magpadulong sa police station 1 agud nga maassist apang nagpamalibad ini bangud nga natrauma ini.
Nagapadayon ang imbestigasyon sang mga kapulisan agud nga matumod kun matuod ukon indi ang natabo.
Ginpasanyog pa sa karun sang Bacolod Police Station 1 ang police visibility kag nagpanugyan man ini nga kun may kaangay nga insidente gilayon nga magtawag sa 911 hotline ukon magreport sang malapit nga police station agud nga gilayon nga marespondehan kag maassist antes ang pagpost sa social media.
