Ginhitso na lamang pinaagi sa settlement ang nagluntad nga pagbinunggu-anay sa Barangay Linao, Kabankalan City kagab-i nga gin-imbulbaran sang tatlo ka salakyan kag isa ka morosiklo.
Suno kay P/Lt. Col. John Joel Batusbatusan, hepe sa Kabankalan City Police Station, nga papauli na kuntani ang Vehicle A nga Nissan kag Vehicle C nga Strada sa Barangay Tagoc sa nasambit nga syudad.
Samtang ginasundan naman sang duha ang vehicle D nga isa ka motorsiklo nga Raider 150 kag sugata naman sang mga ini ang Vehicle B nga Revo.
Pahayag ni Batusbatusan nga updanay ang Nissan kag Strada kag bangod masanag man ang lugar kag mahawan ang 4-lanes nga dalan bangod sa gab-i na, nag-overtake ang Nissan sa motorsiklo pasulod sa inner lane kag nagsunod naman diri ang Strada.
Apang ulihi na sang mga ini natalupangdan ang sugata nga Revo, kun sa diin nagluntad ang head on collision.
Bangod sa pagbunggu-anay sang Vehicle A kag B, nakabunggo naman sa likod nga bahin sang Nissan ang kaupod sini nga Strada kag ang motorsiklo.
Bangod sa insidente pito ka persona ang nakaangkon sang minor injuries nga ginalakipan sang apat nga sakay sang Nissan kag tatlo gikan sa Revo.
Dugang pa ni Batusbatusan nga isa sa mga nasamaran ang gin-admit sa ospital sa Kabankalan bangod sa samad sa ulo samtang may isa naman nga gin-admit sa Bacolod Adventist Medical Center.
