Gin-athag sang hepe sa Bacolod Police Station 3 nga mahimo wala sang motorsiklo nga involve sa nagluntad nga pagluthang-patay sa 31 anyos nga lalaki kahapon sang aga sa Purok Pine Tree, Barangay Bata, Bacolod City.
Madumduman nga una na nga ginpahayag nga ang suspetsado sa pagpatay kay Yuki Castro, residente sa Purok Marapara, Barangay Bata ang naga-angkasanay sa motorsiklo.
Suno kay P/Capt Armilyn Vargas, hepe sa Bacolod Police Station 3 nakakuha sang kopya sang CCTV footage ang imbestigador sang kaso apang ini ang blur gani indi maathagan ang natabo.
Apang paathag sini nga wala sang nakita nga nagdulog nga salakyan sa lugar kun sa diin nagluntad ang insidente gani sa karun natumod na nila nga wala sang riding in tandem nga inbulbado.
Madumduman nga padulong kuntani si Castro sa Purok Pine Tree kun sa diin nagapuyo ang iya nga kahagugma kag mga barkada.
Ginpahayag man sang witness nga nagpakilala nga si Marites nga nagbakal sa iya tyangge sang sigarilyo ang biktima kag kaupod sini ang isa ka lalaki kag isa ka babayi.
Nabatian man sini nga nagakumod si Castro samtang kasugilanon ang chubby nga lalaki sang hinali nalang nga may naglupok kag nakita nalang nga pilason na ang biktima.
Si Castro ang nakaangkon sang igo sang bala sa natuod nga bahin sang dughan nga gintunaan sang iya kamatayon.
Sa karun, wala pa sang matumod nga motibo ang Bacolod Police Station 3, apang nagpasalig man si Vargas sang padayun nga imbestigasyon.
Nagahulat naman ang mga ini kun may witness nga makadetalye sa natabo nga pagpangluthang.
Suno sa hepe, si Castro ang may daan na nga kaso sa Bacolod Police Station 3 maykaangtanan sa Serious Physical Injury kag Illegal Gambling.
