Ginkondenar sang convenor sang Power Watch Negros ang mga nagpakilala nga mga interim board of directors ang Central Negros Electric Cooperative (CENECO).
Sa interview sang Bombo Radyo kay Wennie Sancho, nangin matawhay ang una nga adlaw sa pagboto sa plebisito apang nakita sini nga may yara sang kakulangan sa pagpalapta sang impormasyon sa mga magaboto.
Suno diri, madamo pa sang wala nakahibalo kun ano ang mga requirements kag proseso sa pagboto agud makapasakop sa pagboto sa plebisito gani luyag sini nga ipalapta ang impormasyon agud mas magdamo pa gid ang magboto para sa plebisito.
Dapat gid kun tani nga maeksplekar ang Joint Venture Agreement sa tunga sang Central Negros Electric Cooperative (CENECO) kag Prime Electric Holdings Incorporated.
Suno kay Sancho, ang pagboto sa plebisito tion na para mapagwa sang mga konsumedor ang ila panindugan sa bahin sang JVA.
Dugang pa niya, kun ano man ang mangin resulta, ang konsumedor ang mangin responsable sini bangod indi lahog-lahog ang pagboto diri.
Samtang, para kay Sancho ang JVA mangin isa ka pamaagi agud mapasanyog ang serbisyo sang CENECO, apang ginarespeto man sini ang nagapamatok sa JVA.
Ginkondenar man sini ang mga nagpakilala nga mga interim board of directors sang CENECO, nga isa ini ka paglabutaw sa kooperatiba gani ila dapat nga atubangon ang ipasaka nga kaso sa ila lakip na diri ang mga empleyado sang CENECO nga nag-upod.
Pahayag ni Sancho, indi husto nga magpakita sang ehemplo nga wala sang moral value nga pagasunodon sang iban.
