Napasakaan na sang kaso ang lalaki nga nadakpan matapos hana nga magpangawat sang saway sa transmitter site sang Bombo Radyo Bacolod sa Barangay Punta Taytay, Bacolod City, kahapon sang kaagahon.
Ang nadakpan ang ginkilala nga si Erni Marindoque, single, wala sang trabaho, kag residente sang Brgy Singcang-Airport, Bacolod City.
Nadakpan si Maridoque sang security guard bangod siya ang una nga nagsulod para kawaton ang saway samtang nakapalagyo naman ang duha sini ka upod.
Nalalas na nila ang duha ka 250 meters nga saway sang madakpan, kag nagbato pa ini sa mga security guard rasun nga may nagluntad nga pagpukutay kag nabulit sang lunang ang suspect.
Gin-ako man sang suspek nga ini na ang ikaduha nga beses nila nga pagpangawat sa transmitter site.
Kagab-i, ginhingagaw sa City Prosecutors Office sa ciudad sang Bacolod pagpasaka ang kaso batok sa suspek kag ini ang nakahunong na sa Bacolod Police Station 9.
Nagapanawagan man ang mga kapulisan sa mga pumuluyo nga nabiktima sang mga kawatan nga pasakaan ang mga ini sang kaso agud mapriso kag indi na makapadayon sa ila indi maayo nga ginapanghimo.
