Ginkumpirmar ni Police Regional Office – Negros Island Region Director Police Brig General Arnold Thomas Ibay nga police personnel sang Bacolod City Police Office ang nagpatay kay Kristine Joy Dignadice.
Madumduman nga 4 ka adlaw na ang nakaligad sang nasapwan ang salakyan ni Kristine Joy, 43 anyos, sa sulod sang kampo sa Sitio So-ol, Brgy. Gargato, Hinigaran.
Nakita ang mga dugo sa driver kag passenger seat sang salakyan.
Wala derekta nga ginkumpirmar ni Ibay nga si Kristine Joy ang biktima bangod sila ang wala na ginpapalapit sang Scene of the Crime Operation, apang ginkumpirmar sini nga babayi ang biktima
Ang pulis ang nagsurrender sang aga, nga gin-updan sang police personnel gikan sa PRO-NIR.
Suno kay Ibay, kagab-i nagtawag sa iya numero ang pulis kag nagpahayag nga may impormasyon tuhoy sa kaso.
Sa karun, wala pa ginbulgar ang pangalan sang pulis, kasubong man kun sa diin ini naka-assign sa BCPO.
Ginpahayag ni Ibay nga wala ginlubong ang biktima, sa baylo ginguyod lang pasulod sa kampo agud matago sa bahin sang Central Ma-ao, Brgy Don Jorge Araneta, Bago City.
Wala paman matumod ang relasyon sang pulis sa biktima.
Paathag ni Ibay nga ang Hinigaran Municipal Police Station ang nag-umpisa sang imbestigasyon, apang bangod may nakita nga dugo sa salakyan, una nila ginpangita ang tag-iya sang salakyan nga si Kristine Joy.
Mahimo nga nabatyagan na sang pulis nga nagapalapit na sa iya ang imbestigasyon gani ini ang nagsurrender kag naghatag na sang iya extra judicial confession.
Ginaproseso naman ang dokumento agud mapasaka ang kaso nga murder paagi sa inquest proceedings, nga ipasaka sang Bago City Police Station.
