Gin-aresto ang asawa sang suldado matapos matumod nga ini ang mastermind sa pagpatay sa iya bana kag sa isa ka Cafgu Active Auxiliary (CAA) member, kabulig ang iya kerido kag isa pa ka suspect sa Sitio Calubihan, Brgy Maquiling, Sagay City sang Mayo 12.
Madumduman nga ang mga napatay ang ginkilala nga sanday Corporal Robert Dador, 48 anyos, Assistant Detachment Commander sang Delta Company sang 79th Infantry Battalion sang Philippine Army, residente sang Zaraga, Iloilo; kag Johnrey Moncatar, 26 anyos, sang Special Civilian Armed Forces Geographical Unit kag residente sang Brgy Celestino Villacin, Cadiz City.
Sa interview sang Bombo Radyo Bacolod kay Lieutenant Col. Alvimar Flores, hepe sang Sagay City Police Station, ang duha ka biktima ang sakay sa motorsiklo kag magapangumpra kuntani sang mga kinahanglanon sa detachment, sang sila ang ginluthang sang riding in tandem suspects.
Sa riding in tandem suspects, natumod nga ang driver ang kerido sang asawa sang suldado nga residente sa Mabinay, Negros Oriental, samtang ang isa pa ka suspect ang padayun pa nga ginatumod.
Pahayag ni Flores nga antes ang krimen ang babayi ang sa barracks man nagatinir kaupod sa iya bana, samtang sila ang may bata nga babayi.
Sa natipon nga impormasyon, kaupod ang asawa sa pagplano sa pagpatay sa tinutuyo nga sila ang maka-updanay na sang iya kerido, gani makabig ang krimen nga crime of passion.
Naserbe na kahapon ang warrant of arrest sa babayi, samtang serbihan pa lamang ang iya kerido nga yara sa karun sa Bureau of Jail Managment and Penology sa Mabinay, bangod ini ang naaresto sa lain nga kaso.
Bangod sa pagpatay, ang lalaki nga suspect ang mangatubang sang kaso nga double murder, samtang ang asawa sang suldado ang mangatubang naman sang kaso nga parricide kag murder.
Tubtob sa karun ginatumod pa kun sin-o ang isa pa ka suspect.
