Ginpakigbahin ni Punong Barangay Kim Piramo sang Barangay 19, Bacolod City nga natapos na ang ila nga 180 days preventive suspension sumugod subong nga adlaw, apang indi naman luyag magpanaog sa pwesto ang nagapungko nga officer-in-charge.
Suno kay Piramo, Setyembre 16 sang ginpapanaog ang ila nga 6 months preventive suspension nga natapos kahapon.
Nahibaluan nga nagpahayag naman si DILG Bacolod city director Ma. Joy Maredith Madayag nga indi na kinahanglan sang clearance gikan sa Ombudsman kag kun ano pa nga mga papeles ang mga ginsuspende nga punong barangay bangod automatic na ang mga ini nga makabalik.
Nagmando naman ang DILG sa mga OIC nga nagtake-over sa opisina nga ibalik na ang obligasyon kag ibakante na ang posisyon sa Barangay kag magbalik naman sa pagka Barangay Kagawad.
Nahibaluan nga si Angelo Oberas, ang number 1 nga kagawad ang nagpungko nga OIC sa Barangay 19 sang masuspende si Piramo.
Pahayag sang Punong Barangay nga para sa pormalidad, nagpadala ini sang sulat kay Oberas agud ipahibalo nga magabalik na ini sa opisina sumugod subong nga adlaw.
Apang balos naman ni Oberas nga indi sini pagbuy-an ang pwesto.
Panindugan sang OIC nga magpakita anay sang resolusyon gikan sa ombudsman si Piramo nga nagapamatuod nga natapos na ang suspension.
Pahayag ni Piramo nga indi magpati sa mando sang DILG Head si Oberas bangod panindugan sini nga sa Abril 6 pa siya makabalik.
Paathag sini nga ginapanindugan sang OIC nga sang Oktubre lang ini nakapungko bangod sa mga delays sa mga rekisito.
Nagapati man si Oberas nga wala sang legal basis si Piramo sa pagbalik sa opisina kag iligal ang pagsulat sini sa iya.
