Padayun ang pagbantay sang Hinigaran Municipal Police Station sa mga nagasaka sa Mount Tahutay sa banwa sang Candoni para sa Via Crusis subong nga Holy Week.
Sa interview sang Bombo Radyo Bacolod kay Police Captain Leonel Adolacion, acting chief of Police sang Candoni Municipal Police Station, masobra tres mil ang mga tumuluo nga nagsaka sa Mount Tahutay subong nga Huwebes Santo.
Pahayag sini nga nag-umpisa ang pagsaka sa bukid alas-4:00 kaina sang kaagahon kun sa diin yara man nagabantay ang duha ka pulis, fire personnel, rescue personnel kag mga Barangay Peacekeeping Action Team ukon Barangay Tanod nga ginabanta 50 ka personnel sa kabug-usan.
May kalat man nga ginbutang agud maka-alalay sa mga nagasaka partikular na sa mga mabudlay nga banas.
Kalakip sa mga nagpartisipar sa Via Crusis ang obispo sa Diocese of Kabankalan, mga kaparian, Candoni Mayor Ray Ruiz, kag mga Sangguniang Bayan members sang banwa.
Suno kay Adolacion, kapin 1.5km ang banas pasaka apang may 14 ka Station of the Cross, gani may pahuway man ang mga tumuluo.
Apang aminado ini nga may pila ka mga senior citizens nga nagpabilin lamang sa ika-tatlo nga station of the cross bangod sa kabudlayan nga makasaka.
Suno kay Adolacion, nagalaom sila nga tubtob bwas may-ara pa nga magasaka sa bukid.
Panugyan sini nga indi magbilin sang basura sa ibabaw, sa baylo ini ang dal-on pauli.
Magdala man sang tubig, kag mas maayo nga magsaka samtang wala pa nagsaka ang silak sang adlaw agud indi tuman ka init.
