Nagapanindugan ang suspestado nga nagluthang sa katapo sang Philippine Army nga iya lamang gindepensahan ang iya kaugalingon amo nga nahimo sini ang pagpangluthang.
Ang insidente nagluntad sa Purok San Roque, Barangay Handumanan, Bacolod City sang Enero 4, 2024.
Nahibaluan nga ang biktima nga si Jasper Romas Gancia, 34 anyos, residente sang Brgy. Bata, Bacolod City, nga assigned sa 8th Scout Ranger Camp Ranao, Marawi City ang napilasan sa likod kag tiil nga padayon nga nagapabulong sa ospital.
Samtang ang suspetsado naman amo si Jeffrey Layaon, 26 anyos, residente sang Santo Domingo, Blk 21 Lot 13, Barangay Handumanan, nga nagsungka kagab-i sa Bacolod Police Station 10.
Sa interview sang Bombo Radyo kay Layaon, wala ini una nakahibalo nga katapo sang Philippine Army ang iya natiro.
Suno diri, siya lamang ang suspek kag wala na ini sang iban pa nga kaupod nga mismo ang amay sang nobya ni Gancia nakakita nga naga-isahanon lang ini sang natabo ang shooting incident.
Pahayag ni Layaon, indi man sini hungod nga tiruhon si Gancia apang nakabatyag ini sang kakulba kag iya lamang gindepensahan ang iya kaugalingon bangod nga si Gancia man ang nanguna nga may dala man ini nga armas.
Ang gingamit sang suspek amo ang improvised pin gun kag may bala nga iya sang calibre 45. kag ang bala sang pin gun ang nagmatch sa bala sa crime scene. Samtang, ginpahayag sang station commander sa Bacolod Police Station 10 nga ginapanindugan ang nagsungka nga suspetsado nga nakaluthang sa scout ranger sang Philippine Army sa Purok San Roque, Barangay Handumanan, Bacolod City sang Enero 4, nga siya ang naga-isahanon lamang kag wala sang kaupod.
Madumduman nga nakaangkon sang igo sang bala sa abdomen kag naglapos sa likod ang biktima nga si Corp. Jasper Romas Gancia, samtang nautdan naman sang kamalingking nga tudlo sa tiil ang iya nga nobya.
Ini kasunod ang nagluntad nga argumento sa tunga sang amay sang babayi kag gina-alegar tatlo ka supetsado, apang sang naggwa si Gancia agud kuntani papulion na ang amay sang iya nobya, siya ang ginluthang sang suspetsado.
Sa interview sang Bombo Radyo Bacolod kay Police Captain Lelanie Lagoting, ang suspetsado ang nagsungka pinaagi sa iya nga tiya nga katapo sang force multiplier sa ciudad.
Sa paghinun-anon sini sa suspetsado nga ginkilala nga si Jeffrey Layaon, ginpahayag sini nga siya lamang isa sang natabo ang pagpangluthang.
Suno diri, una nga ginapakdol sang militar ang iya nga kalo bangod sa argumento nila sang amay sang nobya sini, kag sang iya nakita nga kaangay nga magahunos sang armas, iya na ini nga gin-unahan palupok gamit ang improvised pin gun.
Suno diri, nagbalos man ang militar ka sa ila pagbayluhanay sang luthang, ini ang nakapanago sa kampo tubtob sa Enero 5.
Apang matapos mahibaluan nga katapo sang militar ang iya nga natiruhan, ginkulbaan man ini kag gin-ako sa iya tiya ang krimen.
Magluwas pa diri, nakabatun man siya sang impormasyon nga may mga tawo nga nagakadto sa iya puluy-an kag luyag maghinon-anun sa iya.
Bangod sa kakulba kag sa konsensya sa nabuhat nga krimen, nagdesisyon ini nga magsungka.
Panindugan pa sini nga siya ang may pin gun bangod madamo sang salawayon sa ila nga Barangay, kag ini pagpangaman inkaso siya ang tandugon.
Sa pihak nga bahin madumduman nga sa pagsaysay sang mga biktima, si Layaon ang may duha pa ka kaupod kag ini ang na-identify naman sang nobya ni Gancia.
Gani ginapanugyan ni Lagoting nga magsungka naman ang duha ka iban pa nga suspetsado.
