Tuman ang kasubo nga nabatyag sang bana sang napatay nga manunudlo nga sakay sa natumba nga Bacolod City bus sa Purok Talos, Barangay Igmayaan, Salvador Benedicto, sang Hunyo 14.
Sa interview sang Bombo Radyo kay Arvin Verde, bana sang manunudlo nga si Arlyn Tolosa Verde, sang Biyernes, nagahulat ini nga magpauli ang iya asawa, apang kapin alas-6:00 sang hapon nakabaton ini sang message gikan sa abyan sang iya asawa nga naaksidente ang bus nga ginasakyan ni Arlyn.
Nahibaluan sini nga may yara sang isa ka napatay sa aksidente apang wala ini naglaum nga ang nadulaan sang kabuhi amo ang iya asawa.
Gilayon naman ini nga nagkadto sa Bacolod Adventist Medical Center kag ginpangita si Arlyn, apang nakita sini ang abyan nga nagapangayo na lamang sang pasensya sa iya bangod sa natabo.
May yara man sang picture nga ginpakita sa iya apang wala ini nagpati nga amo yadto si Arlyn samtang ang manghod naman sang iya asawa ang nagkumpirmar sang identity.
Ginpaintindi naman sini sa ila walo ka tuig nga bata nga babayi ang natabo kag nagpromisa nga bantayan kag indi gid sini pagbayaan ang ila nga bata.
Madamo sang nagbisita sa haya ni Arlyn, lakip na diri si Murcia Municipal Mayor Victor Gerardo Rojas kag subong nga adlaw ginalauman ang pag-abot ni Bacolod City Mayor Alfredo ‘Albee’ Benitez kag Bacolod City Lone District Congressman Greg Gasataya.
Si Arlyn ang igadul-ong sa ulihi sini nga palahuwayan sa Sabado, alas- 9:00 sang aga sa Murcia Memorial Garden.
