Gin-updan sang masobra duha ka libo nga mga indibidwal ang ginpatigayon nga indignation rally kahapon sa Bacolod City Public Plaza.
Ang mga nag-upod nga grupo amo ang mga estudyante, manunudlo, mga madre, kaparian, concern citizens, mamumugon kag transport groups.
Gin-updan man ang rally sang mga grupo nga nagikan sa ciudad sang Kabankalan, banwa sang Hinoba-an kag Hinigaran, Negros Occidental.
Mismo ang Local government ang naghatag sang masakyan sa mga pumuluyo nga nag-upod sa rally.
Tinutuyo sang indignation rally nga ipanawagan ang pagtapna kag accountability sa nagakatabo nga korupsyon sa pungsod.
Kahapon ang mga nagrally ang nagmartsa halin sa Negros Occidental Provincial Capitol Lagoon padulong sa Bacolod City Public Plaza, kun sa diin madamo nga mga tiglawas sang lainlain nga sektor sa komunidad ang nagpahayag sang ila nga mga hibubun-ot sa gobyerno.
Pila sa mga issues nga ginpadangat sang mga resource speakers amo ang palpak nga Jeepney modernization program, palpak nga joint venture agreement sa tunga sang Prime Water kag Bacolod City Water District (BACIWA) kurapsyon nga nagpalala pa sa pag-antos sang mga mamumugon, kag iban pa.
Wala nakaupang ang init kag ulan sa ginpatigayon nga indignation rally kag ini natapos sang malinong kag matawhay.
