Ginkay-o na sang kontraktor ang naguba nga dalan sa Sitio Minaunong, Barangay San Isidro sa banwa sang Toboso nga naguba matapos ang mabaskog nga pag-ulan sang Sabado.
Sa interview sang Bombo Radyo kay Mayor Richard Jaojoco, alkalde sa banwa sang Toboso, ginbalikan gilayon kahapon sang kontraktor ang amo nga dalan agud nga mahigagaw ang pagkay-o.
Aminado naman ang mismo nga district engineer nga indi insakto ang pag-ubra sa dalan.
Suno sa alkalde, kulang sa integridad ang pag-ubra kag suno diri, kun wala nag-ulan sang mabaskog indi gid makita ang kalidad sa pag-ubra sang dalan.
Sa pihak nga bahin, passable naman ang isa ka lane sang amo nga dalan.
Panawagan sini sa mga kontraktor nga ubrahon sang insakto kun may ara sang proyekto nga ginhatag ang national government.
Dugang pa sini, siyam ka mga barangay sa banwa sang Toboso ang naapektuhan sang mabaskog nga pag-ulan kag pagbaha, kag pila ka mga pumuluyo ang nagahambal nga ini ang una nila nga beses nga naka-eksperyensya sang tuman nga pagbaha.
Ginpahayag sang Alkalde nga sa subong ginaprioridad sang banwa kun ano ang dapat nga unahon apisar sa kulang nga pondo.
Ginalantaw man sini kun ano ang long-term solution sa pagbaha sa lugar.
