Isa ka nagakaagnas nga lapsag ang nasapwan sa Hacienda Malisbog 2, Brgy E. Lopez, siyudad sang Silay sang Mayo 6.
Madumduman nga sang Mayo 5, may yara sang duha mga lapsag ang nasapwan gikan sa syudad sang Sagay kag Kabankalan.
Sa siyudad sang Sagay, wala na sang kabuhi ang lapsag nga babayi sang ini nasapwan kag sa siyudad sang Kabankalan naman lapsag nga lalaki ang nasapwan naman nga buhi.
Sa interview sang Bombo Radyo kay Punong Barangay Memia Gallego sang Brgy E. Lopez, nasapwan ang lapsag nga nakaputos sa lampin kag ginsulod sa karton sa idalum sang taytay.
Suno diri, nakapanimaho sang maisog nga baho ang isa ka pumuluyo, sang iya ini gintsekyar, nakita sini ang karton nga ginbutangan sang lapsag nga ginbilin sa pika-pika sa idalum sang taytay.
Samtang, indi na matumod kun babayi ukon lalaki ang lapsag bangod nga nagaka-agnas na ini, apang nakita man nga may yara na sang buhok ang lapsag.
Sa karun, ginapa-imbistigaran pa kun sin-o ang iloy sang lapsag, nga suno kay Gallego, wala sang balatyagon ang iloy nga nagbilin sang iya bata.
