Yara lamang sa 10 ka porsyento ang mga fish vendor sa Burgos Public Market nga nakabayad sang ila nga arrears sa Bacolod City Government.
Sa interview sang Bombo Radyo Bacolod kay Councilor Celia Flor, chairperson sa Committee on Markets sa Sangguniang Panlungsod, may-ara na ang mga ini sang nadihon nga compromise agreement nga nagahatag sa mga vish vendor sang walo ka bulan agud mabayaran ang ila nga arrears.
Apang nakita nga halos napulo ka porsyento lamang ang nakafully paid sa Bacolod City Treasurer’s Office.
Nagahingyo ang mga fish vendor nga sila ang hatagan sang dugang pa nga anom ka bulan nga extension agud masettle ang ila nga mga balayran sa ciudad.
Apang suno kay Flor, indi ini makadesider kag kinahanglan pa nila nga magpatigayon sang meeting upod sa Local Market Committee samtang wala paman sini nahibaluan ang mangin tikang sang Bacolod City Legal Office.
Suno sa konsehal, nagapanindugan ang mga fish vendors nga sila ang nakabayad, apang sang gintsekyar, kalabanan sa mga ini ang nag-umpisa lamang sa pagbayad subong nga Enero.
Nahibaluan nga antes makakuha sang pwesto sa merkado, nagapatigayon ang City Government sang bidding sa kada stall.
Santo sa layi, kuntani ang nakakuha sang pwesto ang magabayad antes makagamit sang stall, apang ang City Government ang nagpahanugot sang compromise agreement nga amat-amat lamang nga pagbayad.
Ang kada fish vendor ang may balayran nga P16,000 para sa pwesto nga bulanan nga amat-amat nga ginabayaran, samtang sila ang may balayran man nga P100 kada adlaw bilang arkabala.
