Nagdangat sa masobra onse mil ang nagclaim sang food vouchers nga gindonar sang alkalde sang ciudad sang Bacolod agud nga mabuligan ang mga negosyante nga nagrenta sang Kiosko sa Masskara Festival 2024.
Madumduman nga 12,000 tanan ka food vouchers nga nagabalor P2.5 million ang ginhatag ni Bacolod City Mayor Alfredo “Albee” Benitez.
Ang food voucher ang nagabalor sang P200 kada isa kag ini ang ginapabayluhan sa mga kiosko sa festival sites nga ginalakipan sang Bacolod City Public Plaza, UpperEast Megaworld kag sa Bacolod City Government Center.
Suno kay Special Assistant to the Mayor Engineer May Cuaycong, ang food vouchers ang valid lamang tubtob alas-11:59 sang gab-i sang Oktubre 31 kun sa diin alas-12:00 sang kaagahon sang Nobyembre 1, nakaprogram nga indi na mascan ang mga food vouchers.
Suno kay Cuaycong sa kabug-usan 11,034 gikan sa 12,500 ka mga food vouchers ang naclaim sa tatlo ka festival sites.
Ini ginlakipan sang masobra 7,000 ka food vouchers sa Bacolod Public Plaza, 670 sa BCGC kag 835 sa UpperEast.
Suno diri, ang food vouchers nga para sa bisan diin nga kiosks ang ginhatag para sa mga manpower kaangay sang mga kapulisan nga nagduty agud magsiguro sang kalinong kag katawhay sa Masskara Festival 2024.
Agud nga masiguro nga legit ang mga food kiosks nga nagbaylo sang food vouchers, kinahanglan sang mga ini nga magkuha sang certification sa Bacolod Yuhum Foundation kag dal-on sa ciudad agud iscan ang mga vouchers.
Ini agud masiguro nga wala ginphotocopy ang food vouchers, kag sila ang mabayaran.
Suno diri, kun masunod lamang ang timeline, mga requirements kag mahatag na sini ang report, ipreparar nila gilayon ang kwarta nga nagikan mismo sa bulsa sang alkalde.
