Aminado ang nakasaksi sa pagpatay sa agi sa Purok Kamunsilan, Barangay Busay, Bago City, Negros Occidental nga indi na madala sang iya konsensya ang pagtago sa nasaksihan nga pagtagbong sang mga suspetsado sa biktima sa bubon gani nagpanugid ini sa utod makaligad ang apat ka tuig.
Sa interview sang Bombo Radyo Bacolod kay Police Major John Joel Batusbatusan, hepe sang Bago City Police Station, ginpahayag sini nga sang Sabado nagkadto sa Bago City Police Station ang utod sang biktima nga si Joey Jalandoon agud magpablotter bangud nagtawag ang witness nga yara sa Manila nga kutkuton sa bubon ang mga tul-an sang utod sini.
Suno diri, wala nagpanugid sadto ang witness bangud ginpahog ini sang mga suspetsado nga patyon gani nagpa-Manila na lamang ini agud makapalayo.
Gilayon man nga nagresponde ang Bago City Police sa nasambit nga lugar.
Base sa testimoniya sang witness, antes pa ang insidente naga-inom-inom ini sa balay ni Susana Jalando-on mga alas-8:00 ang takna sang gab-i sadtong Abril 15, 2016 tubtob ala-una sang kaagahon sang Abril 16, 2016.
Mga pasado ala-una sang kaagahon, ginhagad siya ni Jay-r Tipawan nga magpauli apang nakalabay sila sa irigasyon kag nagdulog sang makadali.
Pila ka minutos ang nakaligad, naglabay ang biktima nga si Joey Jalando-on kaupod si Stephen Tolosa kag wala sang madamo nga argyumento, ginbuno ni Jay-r Tipawan ang biktima nga nag-igo sa liog samtang ginlampusan naman ini sang martilyo ni Stephen Tolosa.
Matapos ang insidente, gindala sang mga ini ang biktima sa uma ni Federico Tolosa sa nasambit nga lugar kag ginlubong sa bubon.
Sa karun, nagsungka naman sa Bago City Police si Stephen Tolosa apang ginahulat pa ang abugado sini para sa Judicial Confession bilang isa sa mga procedure nga ginasunod agud mafilan sang kaso kag mahulugan sang warrant of arrest sang korte.
Yara sa kustodiya sang Barangay Busay ang suspetsado bangud indi ini mapriso bangud wala pa mapasakaan sang kaso.
Samtang padayon pa nga at large ang isa ka suspetsado.
May close coordination naman ang Bago CPS sa pamilya sini kag nagapati man ini nga magasungka man.
