Dead on the spot ang isa ka lalaki matapos nga ginluthang sa Brgy 6, Bacolod City, Negros Occidental, kagab-i.
Ang biktima ang ginkilala nga si Raymond Dela Torre, house keeping employee sa isa ka mall sa North Capitol Road kag residente sang Purok Mabuhay, Ma-ao Barrio, Bago City.
Sa interview sang Bombo Radyo sa vendor sa area, madugay na sini nga kilala ang biktima nga si Raymond Dela Torre, ginabanta naga-edad sang 24 anyos, bangod ini ang masami nga nagabakal sang juice sa ila.
Kagab-i, bangod nga break time sang biktima sa trabaho sini, nag-utang ini sang buko juice kaupod ang iya abyan nga kaupod man sa tarabaho.
Suno sa manugbaligya, matapos sini nga ginhatag ang juice nagtinir pa sang makadali ang biktima kag abyan sini.
Apang, nagsulod ang manugbaligya sa tindahan sini kag didto na nakabati sang isa ka lupok.
Paggwa sini, iya nakit-an ang abyan sang biktima nga nagpadulong sa iya kag naghambal nga gintiro ang biktima sang isa ka lalaki.
Nakita sini nga nanaog sa motorsiklo ang suspek kag gintiro ang biktima sang isa ka bes.
Gilayon man nga nalagyo ang suspek sakay sa motorsiklo.
Samtang, nagapadayon naman ang imbestigasyon sang Bacolod Police Station 2 sa insidente.
Suno kay Police Major Eugene Tolentino, station commander sang Bacolod Police Station 2, nakatipon na sila sang CCTV footages kag nakit-an ang gunman nga nakahelmet.
Sa inisyal nga impormasyon, ginpark sini ang iya motorsiklo kag ginkadtuan ang biktima, gin-atubang kag didto ginluthang sang isa ka beses.
Nakuha sa lugar ang isa ka empty shell sang wala pa matumod nga kalibre sang armas luthang.
Suno kay Tolentino, ang biktima, nga nagatrabaho sa housekeeping sa isa ka mall ang mabuot kag wala sang problema sa trabaho kun pamangkuton ang iya mga kaupdanan.
