Nagpanindugan ang National Citizens Movement for Free Elections (NAMFREL) nga indi nagakadapat nga suspendihon ukon kanselahon sang Conmission on Elections (COMELEC) ang 2022 national and local elections bangud sa pandemya.
Madumduman nga ginpahayag ni Pampanga 2nd District Representative Mikey Arroyo nga kun mahimo ikonsiderar sang Comelec ang pagpostpone sang 2022 polls bangud sa kahangawa sa COVID-19 pandemic.
Sa interview sang Bombo Radyo Bacolod kay NAMFREL secretary-general Eric Jude Alvia, nahangpan niya ang kahangawa sa coronavirus disease apang may yara pa man sang nagakaigo nga panahon para sa pagpanghanda para sa 2022 elections.
Nakita man sang tanan suno sa iya nga nagahanda man ang COMELEC sa para sa 2022.
Indi man ini mahimo nga ipostpone bangud nakasaad sa 1987 Philippine Constitution nga dapat may yara sang patigayunon nga regular nga national kag local elections.
Suno diri, may yara man sang iban nga pamaagi agud nga mapatigayon ang election.
Suno kay Alvia, ang iban nga lugar kaangay sang Europe, Africa kag Singapore ang nagpatigayon man sang election apang padayunon nila ini apisar nga may yara sang pandemya.
Mahimo suno sa iya nga ibalik ang paggamit sang laptop kag tablet kag pasanyugon lang ang software applications ukon mahimo man nga magpatigayon sang mga advance elections kaangay sang ginapatigayon sa Overseas Filipino Workers (OFW).
Nagpanawagan man ini sa mga pumuluyo nga makigbahin sa elections agud nga mabag-o ang tanan bangud nakita man sang mga pumuluyo kun ano ang dapat bag-uhon sa sistema sang panggobyerno sang Pilipinas.
