Nakit-an sa Barangay Tabunan, Bago City ang lalaki nga namissing sa banwa sang Murcia sang Huwebes, Marso 31.
Una diri, nasapwan nalang ang motorsiklo sang nadula nga ginkilala kay Oliver Ortega apang wala ini sa tupad sang iya motorsiklo.
Suno sa magulang ni Ortega, ulihi na ang mga ini nagpa-blotter sa Murcia Municipal Police Station apisar nga wala pa makapauli si Ortega bangod nagpinsar sang iya nga asawa nga siya ang may ginkadtuan lang.
Ang biktima ang nagatrabaho sa Libertad Public Market sa syudad sang Bacolod bilang tagalasa sang karne sang baboy samtang siya ang nagasagod man sang baboy kag iya man nga pakaisa ang iya nga amo.
Suno sa magulang sang biktima, antes natabo ang pagkadula sini nakabaton siya sang P25,000 nga downpayment sa ginbaligya sini nga baboy nga may kabug-usan nga balor nga masobra P50,000.
Apang nagdangat na ang alas-12 sang gab-i wala gihapon makapauli ang biktima nga masami alas-10:00 pa lang sang gab-i yara na sa ila nga balay.
Nagdesisyon ang pamilya nga ipablotter ang pagkadula sang biktima tubtob sa masapwan ang nagatumbalay nga motorsiklo sini sa Barangay Cansilayan, Murcia.
Kahapon, ginkumpirmar sang magulang nga nasapwan na sang ila nga mga pakaisa ang biktima sa Barangay Tabunan, Bago City nga nagahugsoy lang sa dalan.
Matapos ginpost sa facebook nga nadula si Ortega, may nagcomment naman nga nagpahayag nga nakita ini nga nagahugsoy sa dalan.
Gilayon man nila nga ginkadtuan ang nasambit nga lugar tubtob sa masapwan ini sang ila pakaisa, apang indi na ini makasugilanon sang husto.
Yara pa sa biktima ang sling bag, wallet kag cellphone kag amo man gihapon ang panapton humalin sang madula, apang wala na ang P25,000.
Bangod indi masugilanon sang tadlong ang utod, nagtawag man ang pamilya sang kapulisan agud nga sila ang magpatigayon sang interview agud matumod ang detalye sa natabo sa biktima.
Apang nagpanugyan ang kapulisan nga papahuwayon ini anay bangod mahimo nga wala ini sang tulog kag kaon sa sulod sang apat ka adlaw humalin sang siya ang nadula.
Sa karun ginahulat naman nga mangin estable na ang pinsar ni Ortega agud nga madetalye ang natabo sa iya.
