Wala napatay nga kandila ang ginalantaw nga ginhalinan sang sunog nga nagluntad sa Purok Kasilingan II, Brgy. Mansilingan, Bacolod City, Negros Occidental sang Domingo, Marso 9, sang gab-i.
Sa interview sang Bombo Radyo Bacolod kay Fire Officer 2 Rolin Paulan, Chief Investigator sang Bacolod City Fire Station, duha ka structures ang gintupok sang kalayo nga ginlakipan sang isa ka residential kag isa ka baligyaan.
Suno kay Paulan, ang sunog ang yara lamang sa first alarm kag duha ang totally damaged structures kun sa diin ang balay ang ginapanag-iyahan ni Annabelle Bernabe kag baligyaan ang napanag-iyahan ni Arnel John S. Derla.
Nagdangat sa P12,000 ang balor sang halit nga gintuga sang sunog.
Ginalantaw nga wala napatay nga kandila ang ginhalinan sang kalayo nga nagtuga sang sunog.
Narecord sang Bacolod Fire Station nga fire incidents ang nagdangat na sa siyam kag kalabanan electrical in nature ang ginhalinan sang kalayo nga nagtuga sang sunog.
Bangud sini nagpanugyan si Paulan sa tanan nga bangud sa kainit sang panahon madamo ang nagagamit sang electric fan ukon aircon dapat nga masami nga tsekyaron ang linya sang kuryente agud nga malikawan ang sunog.
