Nagdangat na sa anum ka mga persona ang nagkalamatay matapos ang pagtay-og sang magnitude 7.4 nga linog sa Manay, Davao Oriental sang Oktubre 10.
Sa data sang Office of the Civil Defense (OCD), tatlo ka mga persona ang kumpirmado nga nagkalamatay sa ciudad sang Mati.
Suno diri, duha sa mga ini ang nagamasakit kag yara sa ospital kag sang naglinog, sila ang gincardiac arrest.
Ang isa ang nagatrabaho sa isa ka quarry area kag natabunan sang debris.
Matapos ang isa ka aerial survey, ginkumpirmar ni Dayanghirang nga may yara sang nagluntad nga landslide sa tunga sang Caragona kag Mati sa isa ka passable lane kag may nagguba nga taytay sa Caragona.
Suno diri, pila ka mga public school buildings ang nakaangkon man sang halit.
Samtang, ginpahayag man sini nga may yara sang nareport nga duha ka mga fatalities sa isa ka mining area sa Barangay Kingking Pantukan sa Davao de Oro.
Samtang, sa Davao City, isa ka 80-anyos nga lalaki ang naigo sang nagcollapse nga pader sa Tomas Monteverde.
Sa karun nagapadayon pa ang monitoring sang OCD sa nasambit nga mga lugar bangud sa nagakabatyagan pa nga mga aftershocks.
