Anum tanan ang narekord nga nadulaan sang kabuhi sa nagluntad nga pagbaha kag pag-inulan sa probinsya sang Negros Occidengal tuga sang hangin habagat nga ginpabaskog sang Bagyo Crising.
Suno kay Negros Occidental Provincial Disaster Risk Reduction Management Office Head Irene Bel Ploteña, sang Hulyo 17 may duha nga nakuryente sa banwa sang Hinobaan kun sa diin ang biktima nga si Jomalyn Omaque nagapanghalay sang iya ginlabhan apang natumba ang kahoy nga nag-igo sa open wire kag ang kahoy nasab-it sa alambre nga ginahalayan sini.
Natumba si Omaque kag ginpalapitan ni Florante Janoy nga nakakita sa iya kag sang iya gintandog si Omaque, siya nakuryente kag napatay man.
Sang Hulyo 16 may yara sang isa ka missing nga mangingisda nga si Glen Trejeros, 30 anyos sang Purok Crotons, Old Sagay, Sagay City nga nasapwan na lamang nga wala sang kabuhi sang Hulyo 20.
May yara man sang 84 anyos nga PWD nga nalumos sa Brgy San Jose, Binalbagan sang Hulyo 17.
Bangod madasig ang pagsaka sang tubig baha, una nga ginpasaka sa ikaduha nga panalgan sang balay ang mg apo apang sang pagpanaog agud balikan ang senior citizen nakit-an na lamang ini nga nalumos kag wala na sang kabuhi.
Samtang may yara man sang 12 anyos nga lalaki nga may epilepsy nga naanod sa suba sa Brgy Santol, banwa sang Binalbagan kag nasapwan nga wala na sang kabuhi.
Kag ang anay seaman nga si Medjun Cordero, 44 anyos nga naanod sa suba sa ciudad sang Himamaylan.
Sa karun suno kay Ploteña, 206 ka pamilya ukon 822 na lang ka indibidwal ang yara sa evacuation center as od 6:00 pm kahapon.
Suno diri, wala naman sang lugar sa probinsya nga may-ara pa sang baha.
