Naturn-over na sa pamilya ang bangkay sang 47 anyos nga rebelde nga napatay sa nagluntad nga engkwentro sa tunga sang militar kag New People’s Army sa Hacienda Paraiso, Brgy Caduha-an, Cadiz City sang Domingo, Marso 9 sang kaagahon.
Ang napatay ang ginkilala kanday Hans Ponteras Alyas JOJO/LANCE/TEDDY/MOJO kag nagapungko nga Regional Front Secretary kag Finance Officer kag pinuno sang Regional Taxation Implementing Group sang Komiteng Rehiyon – Negros, Cebu, Bohol, Siquijor (KR-NCBS).
Si alyas Jojo ang residente sang Brgy Banago, Bacolod City kag sa interview sang Bombo Radyo sa utod sini nga si alyas Rhea, ulihi sini nga nakita ang iya manghod sang 17 anyos pa lang ini kag nabalitaan na lang nga nakagradwar sa kolehiyo sa isa ka pribado nga bululthuan sa Bacolod sa kurso nga political science.
Suno pa kay Rhea, wala sila nakahibalo nga nag-upod sa NPA ang iya manghod kag isa pa sa high ranking official.
Sa karun na lamang sila nakabaton sang balita tuhoy kay Jojo kag ini sang siya ang napatay sa engkwentro.
Pahayag sini, sadto mahilg mamati sang radyo ang iya manghod kag naghambal nga luyag sini magserbisyo sa pungsod.
Suno sa magulang, bisan ano pa nadangatan sang iya utod, proud ini sa gihapon sa iya sa kun ano man ang iya ginapatihan.
