Bugtong nga babayi sa anom ka mag-ulutod ang manunudlo nga nadulaan sang kabuhi kasunod sang pagkatumba sang bus sang Bacolod City government sa Purok Talos, Brgy Igmaya-an, banwa sang Salvador Benedicto kahapon.
Madumduman nga napatay sa aksidente si Arlyn Tolosa Verde samtang pilason naman ang 35 ka iban pa, kun sa diin walo ang nagapabilin nga yara sa ospital samtang nakapauli na ang iban pa.
Sa interview sang Bombo Radyo Bacolod kay Alfredo Tolosa III, magulang ni Arlyn, sang aga antes maghalin, naghambal pa ang biktima nga nagasakit ang iya nga tyan gani ini ang ginhambalan sang iya nga bana nga indi na lamang mag-upod.
Apang ini ang nag-insists kag maglakat, apang kapin alas-6:00 sang gab-i sila ang nakabatun na lamang sang impormasyon nga gindala na sa ospital ang mga pasahero kasunod sang pagkatumba sang bus.
Pagpadulong sa Bacolod Adventist Medical Center (BAMC), gilayon nila nga ginpangita si Arlyn apang wala sa record sang mga naadmit tubtob nga sila ang gin-atubang sang principal sang Paglaum Village Elementary School.
Didto nahibaluan nga si Arlyn ang wala na sang kabuhi pagdangat sa ospital kag ginderetso na lamang sa morgue.
Pahayag ni Tolosa nga sa impormasyon sini nga nabatun, bangod nerbyosa ang ila manghod, ini ang nagtindog sang nagbalang-balang ang bus, gani gikan sa pwesto sini sa likod sang driver, ini ang naglabog kag nalampos ang ulo.
Nagahilibion si Tolosa sa pagdumdom, nga si Arlyn amo ang nagapalipay sa ila pamilya kag ini ang nagplano pa sang nakaligad nga sila ang mag-amot amot nga mag-ulutod agud masurpresa ang ila iloy sa paglantaw sang sine.
Madumduman nga ginpahayag sang driver sang bus nga si Nelmo Gonzaga, nga ang mga manunudlo ang gikan sa team building sa Sipaway Island apang pagdangat sa dulhugon kag blind curve nga lugar, nautod ang iya prino gani ginpili na lamang sini nga tumbahon ang bus sa baylo nga ini ang mahulog sa pil-as.
