Nakilala na ang mga napatay nga katapo sang New People’s Army sa magkatuhay nga engkwentro sa tunga sang tropa sang 94th Infantry Battalion kag sa 62nd Infantry Battalion sang Philippine Army.
Sa interview sang Bombo Radyo Bacolod kay Col. Michael Samson, acting commander sang 303rd Infantry Brigade, natumod na ang napatay nga miyembro sang NPA nga napatay sa engkwentro kahapon nga nagluntad sa Sitio Maliko-liko, Barangay Carabalan, Himamaylan City, Negros Occidental.
Suno kay Samson ginkilala ang napatay kay Jose Gonzales alyas Warly, residente sang nasambit nga lugar kag miyembro sang Sandatahang Yunit Propaganda (SYP) Platoon Central Negros 2.
Kahapon, napaatay ang isa ka miyembro sang New People’s Army sa nagluntad nga engkwentro sa tunga sang 94th Infantry Battalion sang Philippine Army kag katapo sang Himamaylan City Police Station sa Sitio Maliko-liko, Barangay Carabalan, Himamaylan City, Negros Occidental.
Naglawig ang engkwentro sang lima ka minutos kag naengkwentro sang tropa sang gobyerno ang kapin napulo ka mga rebelde.
Nakumpiskar ang isa M14 Rifle, isa ka M4 Rifle, isa ka M79 grenade launcher, duha kaM16 Rifle, isa ka Rifle Grenade, pito ka M14 rifle magazines and ammunitions, isa ka M4 rifle magazine kag ammunitions, apat ka grenade launcher ammunitions, duha ka Bandoliers, isa ka Backpack, isa ka NPA Flag kag subersibo nga dokyumento.
Samtang ang napatay naman nga miyembro sang NPA sa engkwentro nga nagluntad kaina sang aga sa Sitio Banderahan, Brgy Trinidad, Guihulngan City, Negros Oriental.
Ginkilala ang napatay kay Orlando Fat alyas Fatfat, siya ang political instructor sang Central Negros 1.
