Nakilala na ang lalaki nga ginapatihan katapo sang New People’s Army sa nagluntad nga engkwentro kahapon sang kaagahon sa Barangay Quintin Remo sa banwa sang Moises Padilla, Negros Occidental.
Sa interview sang Bombo Radyo Bacolod kay Moises Padilla Mayor Ella Yulo, ang biktima ang ginkilala kay Marlo Catacio alyas Malot, 24 anyos kag residente sang Barangay Quintin Remo.
Si Catacio ang napatay sa engkwentro sa tunga sang tropa sang 62nd Infantry (Unifier) Battalion kaupod ang 2nd Negros Occidental Provincial Mobile Force Company kag sang remnants sang Central Negros 1 (CN1) sa Sitio Angalan Brgy Quintin Remo.
Ang biktima ang isa sa lima ka mga suspects nga nagpatay kay Joemari Benitez sang Purok Inarawis, Barangay Quintin Remo, banwa sang Moises Padilla.
Suno kay Yulo, nahatagan na sang banwa sang kit kag food pack kasubong man sang P5000 cash assistance.
Ang banwa man ang naghatag sang inugpabalsamar sa bangkay sang biktima kag sang lungon sini.
Samtang ang kapin 300 ka mga residente ukon 55 ka pamilya nga nag-evacuate bangud sa engkwentro ang nakapauli na matapos nga maclear sang Philippine Army ang lugar kag nahatagan naman sang banwa ang mga ini sang food packs.
Panugyan ni Yulo, nga makaestoryahanay ang Philippine Army kag ang New Peoples Army bangud halin sang una nga inaway kag nagdangat na sa 50 ka tuig wala man sang nahimo ang armas agud masolbar ang problema.
Suno diri, ang solusyon sa kapigaduhon amo ang pagpanganikasog kag indi ang pagpadulong sa kabukiran agud nga kontrahon ang gobyerno.
