Duha na ang napatay bangod sa Dengue sa Bacolod City santo sa record sang Bacolod City Health Office.
Ang kabug-usan nga kaso humalin Enero tubtob Agosto 3 ang nagdangat na sa 434 kun sa diin sa record sang Hulyo 28 tubtob Agosto 3, nagdangat sa 105 ang nadugang nga dengue cases.
Sa interview sang Bombo Radyo Bacolod kay Bacolod City Councilor Claudio Jesus ‘Kalaw’ Puentevella, chairperson sang Committee on Health and Sanitation sang Sangguniang Panlungsod, tuman ka maka-alarma ang tuman ka dasig nga pagsaka sang kaso.
Ini ang 37 porsyento nga mas mataas kun ipaangid sa dengue cases tinalikdan nga tuig nga nagdangat lamang sa 317 ka kaso kag may tatlo nga napatay.
Ang pinakamataas nga kaso ang yara sa Barangay Taculing nga nagdangat sa 60, ginasundan sang 41 sa Bata, Villamonte 32, tig-27 naman sa Granada, Estefania kag Mansilingan, 24 sa Cabug, 21 sa Alijis, 20 sa Banago kag Mandalagan, 17 sa Tangub kag 16 sa Sum-ag, Bacolod City.
Suno kay Puentevella, sila ang nag-umpisa sa fogging binulan na antes pa ang pag-umpisa sang klase agud mangin safe ang mga kabataan kag nagalibot man sa mga Barangay partikular na ang mga may marecord nga kaso.
Apang bukas man ang CHO sa pagbatun sang mga request sa fogging.
Panawagan naman sang konsehal sa mga ginikanan nga magkooperar kag limitahan ang outdoor activities sang mga kabataan ilabi na nga mataas ang cases ilabi na sa edad nga 1 tubtob 10 nga nagdangat sa 79 ka kaso kag edad 11 tubtob 19 nga nagdangat sa 118 ka kaso.
Madumduman nga ang una nga narecord nga napatay ang isa ka 18 anyos nga babayi gikan sa Barangay Estefania, samtang ang latest death ang wala pa sang may napagwa nga impormasyon.
