Masobra 250 pa ka mga persona ang missing matapos masunog ang residential complex sa Tai Po nga gintunaan sang kamatayon sang indi magnubo 83 ka mga persona.
Ginalauman sang mga otoridad sa Hong Kong nga magasaka pa ang numero sang mga napatay sa sunog sa nasambit nga lugar.
Ini matapos nga may 83 ka tawo na ang ginkumpirmar nga napatay kag madamo pa ang ginapangita.
Samtang, isa ka lalaki ang na-rescue sang mga bombero sa 16th floor gikan sa tower sang Wang Fuk Court complex.
Nahibaluan nga masobra 4,000 ka tawo ang naga-istar sa public housing sa Tai Po City.
Isa ka adlaw matapos nagluntad ang sunog sa walo ka mga buildings nga may 2,000 ka mga units, nag-itom na ang exteriors sang nasambit nga mga buildings.
Nagsugod na ang mga otoridad sa pag-imbestigar kun ano ang gintunaan sang kalayo, lakip na ang presensya sang bamboo scaffolding kag plastic mesh nga nakapalibot sa structures bilang kabahin sang construction work.
Suno sa anti-corruption body sang Hong Kong, naglunsyar na ini sang imbestigasyon sa ginapatigayon nga renovation sa housing complex, pila ka oras matapos ginpahayag sang police nga naaresto sang mga ini ang tatlo ka mga persona nga ginaalegar ginbilin ang foam packaging sa fire site.
Suno sa pila ka mga residente sang Wang Fuk Court, wala sang may nabatian nga fire alarm ang mga ini kag kinahanglan pa nga magpanuktok sa mga pertahan sang ila mga kaingod agud ipahibalo nga may yara sang sunog.
Padayon ang imbestigasyon sang mga otoridad sa ginhalinan sang sunog.
