Personal nga ginpalab-ot ni President Ferdinand Marcos Jr ang P100 million nga bulig pinansyal kay General Santos City Mayor Lorelie Pacquiao sang magkadto ini kahapon sa Mindanao.
Ang nasambit nga pondo ang para sa pagpakay-o sang General Santos City Hall.
Suno kay Marcos, naggikan ang pondo sa Local Government Support Fund.
Gin-anunsyar man sang presidente nga ang tanan nga pamilya nga napatyan ang makabaton sang tig-P50,000 nga ayuda.
Hatagan man sang bulig pinansyal ang lokal nga panguluhan sang Sarangani kag South Cotabato para sa pagpa-repair sang mga naguba nga imprastraktura.
Ginpasiguro man sang presidente nga ginatutukan sang National Housing Authority (NHA) ang mga manunudlo kag iban pa nga nakaekeperyensya sang halit tuga sang linog.
Magluwas sa relief goods, pagkaon, kag serbisyong medikal, nagpasalig man ang gobyerno nga maghatag bulig pinansyal para sa mga mamumugon nga apektado sang temporaryo nga pagsirado sang mga establisyimento sa idalom sang sistema nga no work, no pay.
