Ginapasalig sang National Police Commission nga wala nagakahulugan sang militarisasyon ang presensya sang mga kapulisan sa gwa sang eskwelahan.
Nahibaluan nga ginmando sang Police Regional Office Negros Island Region ang pagpasanyog sang mobile kag foot patrol sa palibot sang mga buluthuan.
Ini kasunod sang asod-asod nga mga insidente sa buluthuan kaangay sang serye sang stabbing incident sa Cavite City kag ang Mass Shooting sa Tacloban City.
Samtang may-ara man sang naglapta nga pagpamahog sa social media angot sa plano sang isa ka estudyante nga ginkilala lamang nga si Jacob nga magpangluthang sa Escalante National High School.
Sa interview sang Bombo Radyo Bacolod kay NAPOLCOM – Negros Island Region Director Atty Owen de Luna, indi nila luyag nga mamisinterpret sang mga ginikanan, kabataan, kag school personnel nga nagapatigayon na sang militarisasyon.
Sa baylo, ang presensya sang kapulisan ang agud makahatag sang seguridad sa mga buluthuan.
Pasalig sini nga sa gwa lamang sang mga eskwelahan magabantay ang kapulisan, kag magasulod lamang kun may matabo nga insidente nga kinahanglan nagid ang ila presensya.
Panugyan man ni De Luna sa mga pumuluyo nga indi magkahuya nga magpalapit sa mga kapulisan kun may concern, agud ma-imprubar pa ang systema sang police service.
Dugang pa niya nga kun may nahibaluan tuhoy sa isa ka insidente ukon krimen, importante nga manugid sa talatapan sang kapulisan agud makabulig sa imbestigasyon.
