Liwat nga ginpadulungan sang regional director sang National Police Commission (NAPOLCOM) Region 6 ang morthern Negros para sa surprise visit sa mga police station sa probinsya.
Suno kay Atty. Joseph Celis, nagpadulong ini sa Escalante City Police Station, padulong sa San Carlos City Police Station, Calatrava Municipal Police Station kag pabalik sa nangin kontrobersyal nga EB Magalona Municipal Police Station.
Pasado ala-1:00 sang kaagahun na sila sang nag-abot sa San Carlos City Police Station kun sa diin nakita nila nga alerto kag kompleto ang on-duty nga kapulisan.
Ginpaporma nya naman ang mga ini kag nakita sini nga positibo kag aktibo ang mga police personnel kag gintsekyar man sini isa-isa ang duty details.
Nakigsugilanon na ini sa mga personnel kag ginpahanumdom sa mga ini ang kahandaan kag police visibility.
Ginpakigbahin ni Celis nga maayo ang sitwasyon sang tanan nga police station nga iya ginpadulungan.
Samtang sa pagbalik sini sa EB Magalona Municipal Police Station, nakita man sini nga may nahakot na nga mga balas, mga hollowblocks kag amat-amat na nga ginatinluan ang estasyon.
Under rennovation naman ang anay ginreklamo sini nga mahigko nga CR kag nagpaminta na sa atop sang Police Station.
Pahayag ni Celis nga nakita sini ang pagbag-o sa estasyon, matapos sang kontrobersyal sini nga pagbisita sang nakaligad kun sa diin nagakatulog ang tanan nga on-duty personnel kag mahigko ang Police Station.
Ginpasalamatan man sini ang local government unit sang banwa sang EB Magalona nga gilayon nga nagresponde sa kinahanglanon sang estasyon.
Paathag ni Celis nga may mandatu ang Philippine National Police (PNP) sa NAPOLCOM nahanungod sa operational kag organizational supervision sa mga Police Station sa rehiyon.
Pahanumdom sini nga indi lang presensya sang kapulisan ang importante, subong man ang katinlo sang pasilidad.
Suno sa regional director, ang public office ang dapat man nga mangin public trust kag indi opisina sang mga opisyal ang ila ginapanguyatan, kundi iya sang pumuluyo.
Gani pahanumdom sini nga ang serbisyo ang dapat nga ginapalab-ot sa tawo nga may kaupod nga tagipusuon, indi nga para lang sa personal nga benepisyo.
Pahanumdom sini nga dapat may commitment sa trabaho ang mga kapulisan kag indi pag-unahon ang kwarta.
