Ginpasalig sang isa sa 10 ka mga grupo nga magacompete sa Handog ng Bombo Radyo kag Star FM sa MassKara Festival – Dance Showdown Competition ipakita nila ang ila nga best kag ipamatud-an ang ikasarang sang ila bag-o nga grupo.
Sa interview sang Bombo Radyo Bacolod kay Lovely Abad, senior high school student sa Bacolod City High School, ang New Team ang nagikan sa sadto West Crew team nga makapila naman nga nagpasakop sa nakaligad nga mga Dance Showdown Competition sang Bombo Radyo kag Star FM sa Masskara Festival.
Si Abad nga nangin miyembro sang 2018 sang West Crew ang nagpabilin tubtob sa pagtukod sang New Crew subong nga 2023.
Suno diri, bangod kalabanan sa mga dancers sadto ang wala na kag lunsay mga bag-o ang subong nga mga miyembro, nagdesisyon ang ila nga trainor nga si Nolan Galampanao nga islan ang pangalan sang dance group sang New Crew.
Sa Bacolod City High School, naumpisahan ang anay West Crew nga ginabug-usan sang mga estudyante gikan sa nanarisari nga grade level.
Sadto yara sa 15 tubtob 20 ang miyembro sang West Crew, apang karun sa New Crew sila ang napulo na lamang.
Paathag ni Abad, nga sila ang naga-ululupod lamang sa masami kun may-ara sang kompetisyon nga pasakupan.
Samtang ginpasalig naman ni Willy Mahilum, member sa grupo kag 2nd Year BS Education student sa San Agustin Bacolod nga malauman sa ila ang mas maayo nga performance.
Ini bangod sila ang nagpractice sang malawig kag ila gid nga ipakita ang ila nga best agud pamatud-an nga mas mabaskog ang subong nga New Team.
Paathag ni Mahilum nga magluwas sa target nga premyo, isa sa rasun sang ila nga pagsaot ang bangod sa passion kag makabig bonding naman sang ila nga grupo.
Suno naman kay Dalyn Jean Cantero, member sa New Crew kag classmate ni Mahilum, isa sa ginalantaw nila nga mabaskog nga makasumpong sa Handog ng Bombo Radyo kag Star FM sa MassKara Festival – Dance Showdown Competition amo ang UFC ukon United Freestylerz Crew.
Ini bangod masami man nila ini nga nagaka-atubang sa mga kompetisyon.
Aminado si Cantero nga ang pagpasakop sa mga kompetisyon ang nagabulig man sa ila partikular na sa allowance, apang apisar nga indi magdaog pahayag sini nga sila ang may-ara man gihapon sang nagakatun-an.
Bangod sini, panugyan na lamang ni Cantero nga bantayan ang New Crew sa Biyernes, Oktobre 20 sa ila pagperform sa Bacolod City Public.
